Eugenio Jiménez Gabarriz, CIFP Don Bosco LHII ikastetxeko Sareko Informatika Sistemen Administrazioa (ASIR) zikloko ikaslea, 2025eko Kale Dor Kayiko Saria jaso duen ikasleetako bat izan da, bere ibilbide akademikoa eta ahalegina aitortuz.
Sari banaketa ekitaldia ekainaren 17an ospatu zen Donostiako UPV/EHUko Hezkuntza, Filosofia eta Antropologia Fakultateko ekitaldi aretoan. Kale Dor Kayiko Sariek euren ikasketetan aurrera egin duten ijito ikasleen lana eta konpromisoa balioan jartzea dute helburu, eta 21. edizioa izan da aurtengoa.
Zer da Kale Dor Kayiko?
Ijito Herriaren gizarteratzea eta berdintasuna sustatzeko lan egiten duen elkartea da, hezkuntza akademikoa ardatz nagusitzat hartuta. Uste dute hezkuntza dela bazterkeria gainditzeko eta aukera berdintasuna lortzeko bide bakarra. https://www.kaledorkayiko.org/
Zertan datza Kale Dor Kayiko Saria?
Hezkuntza-etapa bat (Lehen Hezkuntza, DBH, Lanbide Heziketa, Batxilergoa, Unibertsitatea…) gainditu duten ijito ikasleei aitortza publikoa egitean datza. Ikasleen esfortzua eta aurrerapena jendaurrean aitortzen da, eta aldi berean, ikasten jarraitzera bultzatzen dituzten mezuak jasotzen dituzte.
CIFP Don Bosco LHII ikastetxetik, Eugeniori gure zorionik beroenak helarazi nahi dizkiogu, bere lan nekaezinagatik eta komunitate osoarentzat eredu inspiratzaile izateagatik.
Zorionak, Eugenio!
